Ko čalmelaasah iä pijssáá -tieđettemčáálus almostui kuulmâ sämikielân
Uáinimvádulij litto lii almostittám Ko čalmelaasah iä pijssáá -tieđettemčáállus kuulmâ sämikielân. Tieđettemčálusân láá nurrum tiäđuh uáinimvádulij kuávdášlijn palvâlusâin já toorjâtooimâin.
Tavesämikielân, anarâškielân já nuorttâlâškielân almostittum tieđettemčálusist mij muštottep, ete hiäjusmum uáinoin ij taarbâš pääcciđ ohtuu. Palvâlusâi já rievtislágán torjuu vievâst puáhtá paijeentoollâđ šiev eellimkvaliteet, veikâ jieš čalmepuácuvuođâ ij pastegin pyerediđ.
Suomâst ääsih suulân 10 000 sämmilâžžâd, main suulân peeli sárnuh sämikielâ eenikiellân. Sämikielâin lii lamaš Suomâst virgálâš sajattâh sämmilij päikkikuávlust ađai Iänuduv, Aanaar já Ucjuv kieldâin sehe Suáđigil kieldâ taveuásist ive 1992 rääjist. Sämmilijn lii vuoigâdvuotâ ášástâllâđ jieijâs eenikielân eereeb iärrás virgáduvâin já pyecceiviäsust.
- Sämikuávlu ulmuuh iä tieđe tuárvi soti-seervij palvâlusâin já tondiet tain tieđettem lii taarbâšlâš, iätá Laapi pyereestvaijeemkuávlu sämikielâlij já kulttuurmiäldásij palvâlusâi palvâlemhovdâ Mirja Laiti.
Sun paahud, ete kirjálii materiaal lasseen meid njálmálâš tieđettem lii tehálâš, tastko sämikielâliih materiaaleh išedeh tuš sii, kiäh láá oppâm sämikielâ.
- Ive 1971 šoddâm ulmuuh láá vuossâmuš aheluokka, mii lii pastam jotteeđ oles vuáđuškoovlâ sämikielân, jis lii halijdâm. Tađe puárásub ulmuuh iä määti luuhâđ já čäälliđ sämikielân, jis iä lah tom sierâ máttááttâllâm rävisolmožin, Laiti iätá.
Mii puárásijpaargon spesiaališum vuoigâdvuođâkocceem äššitobdee Sanna Piuva Ruávinjaargâ toimâttuvâst muštâl, ete eidu tiäđu vänivuođâ tiet iä ain määti uuccâđ iše tiileest, kuás uáinu hiäjusm.
Uáinimvádulii ulmuu aargâst išepiergâseh láá stuorrâ iše já persovnlâš išedeijee puáhtá išediđ ovdâmerkkân poostâ luhâmist já käävpist elimist. Toos lasseen Uáinimvádulij seervih pirrâ Suomâ fäälih viärdásâštorjuu: lii mávsulâš tiettiđ, ete ij lah ohtuu jieijâs eellimtiilijn.
Laapi pyereestvaijeemkuávlust láá eidu joođoost kyehti haavâ, main ovdedeh sämikielâlijd já sämmilii kulttuur miäldásijd peerâ-, mielâtiervâsvuotâ- já uáiváditteepalvâlusâid. Ulmen lii, ete sämikielâláid palvâlussáid stivrim puárrán.
Sämikielâliih Ko čalmelaasah iä pijssáá -tieđettemčáluseh kávnojeh mii nettisiijđoin.
Lasetiäđuh:
puárásijpargo äššitobdee Sanna Piuva
Uáinimvádulij litto
p. 0500 210 568
Sivu päivitetty